BACOLOD CITY – Nag-angkon sang mga pilas sa iya lawas ang isa ka taxi driver matapos ini ginbuno sang duha ka hubinon nga mga suspek nga naghold-up sa iya kaina sang kaagahon sa dalan Galo PLDT, Bacolod City.
Nakilala ang biktima nga si Donato Cortez Sr. 64 anyos kag pumuluyo sang Purok Sawmill 3, Brgy. Bata.
Suno sa driver nga may mga las 4 kaina sang kaagahon, nagsakay sa iya ang duha ka suspek halin sa dalan Gonzaga Locsin kag ini sila ang nagpalibot-libot.
Sa pag-abot sa dalan Galo PLDT, didto na kag nagdeclare sang hold-up ang mga suspek nga ang isa nagapungko sa likod, ang isa yara sa front seat.
Apang nagbato ang driver gani ini ang nag-angkon sang kapin 4 ka pilas tuga sang pagbuno sa iya dughan kag kamot.
Pahayag sang driver nga ini siya ang nakabuno man sa isa ka suspek nga gilayon nagpalagyo.
Wala sang may nakuha nga kwarta halin sa biktima ang mga suspek kag ila na lamang ginhukas ang dash cam sang amo nga taxi. Padayon karon ginabulong sa Corazon Locsin Montelibano Memorial Regional Hospital ang biktima./dyHB BACOLOD
