BACOLOD CITY – Nadulaan sang masobra 60 mil nga balor sang alahas kag cash ang isa ka senior citizen matapos nga ini siya ang ginkawatan sadtong nagligad nga Pebrero 1 sang aga.
Ang biktima nakilala kay Consolacion Sejo, 68 anyos ang edad, single kag residente sang 18th Galo Street, Bacolod City.
Suno sa biktima pasado las 8 sang aga sadtong February 1, 2018 nakibot siya nga guba na ang kandado sang cabinet sa iya kwarto.
Sang iya ginlantaw didto kay iya natukiban nga nadula na ang iya kulintas nga nagabalor sang P45 mil pesos, earrings ukon aritos nga nagabili P2,500 pesos kag cash nga kapin P20 mil pesos.
Nagapati si Consolacion nga ang may kahimuan sa pagkadula sang iya mga alahas kag kwarta amo naman ang iya upod sa balay nga si Mildred Gepilga, legal ang edad kag tumandok sang Brgy. Ma-ao, Bago City nga temporaryo nga naga-istar sa iya balay.
Kahapon lang nagpadulong sa Station 1 ang biktima agud nga pormal nga mapa-record ang natabo nga pagpangawat sa iya./dyHB BACOLOD
