BACOLOD CITY – Nagapudag-pudag kag nagakumod nga nagpadulong sa estasyon sang pulis ang isa ka ginang agud ireklamo ang isa ka persona nga nagpalapta istorya ukon nag-chismis nga isa siya ka “aswang.”
Si Marivic Espania, 52 anyos ang edad, pumuluyo sang Purok Boulevard, Brgy. 13 ang nagpadulong sa Police Station 1 agud ipa-blotter ang isa ka nakilala kay Judith Cabatuan, 51 anyos ang edad kag pumuluo sang Brgy. 14.
Suno kay Marivic nga pasado las 2 kahapon sang hapon sang iya nabatian nga ginapalapta ni Judith ang istorya nga aswang ini siya gani tuman nga kahuya ang iya ginbatyag.
Nahibaluan nga iya na sadto ginreklamo sa barangay si Judith bangud man sang pagpalapta niya sang chismis, apang nagpadayon ini sang pagpalapta sang amo na sugilanon rason nga iya na lamang ini ginpa-blotter./dyHB BACOLOD
