MURCIA, NEGROS OCCIDENTAL – Nagresulta sa wala ang dapat kuntani handum sang isa ka OFW nga mahatagan sang maayo nga bwas damlag ang iya mga kabataan pinaagi sa pag-trabaho sa pungsod Kuwait.
Ang biktima nga si Josie Perez Lloren, 40 anyos ang edad, single mother nga OFW kag tumandok sang Brgy. Caliban, banwa sang Murcia ang nagpadulong sa Kuwait sadtong tuig 2015 kag nagtrabaho bilang domestic helper.
Napilitan si Josie nga mag-obra sa iban nga pungsod agud nga may masagud sa iya tatlo ka mga kabataan naga edad, 20 anyos, 12 kag 8 ka tuig subong man agud nga mabuligan ang iya mga ginikanan kag kauturan nga tuman ka pigado.
Natapos ang kontrata ni Josie sadtong 2017 apang imbes nga magpauli, ini siya ang nagpangita sang iban pa gid nga employer.
Sang amo man nga tuig sang nahibaluan sang pamilya ni Josie nga gina-maltrato siya sang iya amo, partikular sang asawa sang iya employer nga nagakastigo sa iya.
Wala labot sini, suno sa utod sang biktima ginapagutuman pa si Josie kon diin las 4 na sang hapon ini ginapakaon sang iya amo apesar nga halos wala pahuway ini sa iya trabaho.
Sadtong January 26, 2018 nakapauli gid man sa Pilipinas si Josie, nagpasugat ini sa iya hinablos sa Manila apang imbes nga sa balay, ini siya ang gindiretso na sa ospital bangud tuman na ini ka luya kag pwerte ka niwang.
Duha ka semana matapos na-ospital, sadtong February 9, nagtaliwan si Josie sa Caloocan Medical Center.
Base sa Quarantine Permit, nagapakita nga ang cause of death ni Josie amo ang Cardio Respiratory Arrest secondary to Cerebrovascular Disease probably bleed.
February 15 sang gindala pauli sa Murcia ang bangkay ni Josie kag kahapon, February 19 ini siya ang ginlubong sa Murcia Public Cemetery.
Sa karon, nagabakho ang pamilya ni Josie kag nagalaum nga kuntani may ahensya sang gobierno nga makabulig sa ila agud nga mahibaluan gid ang matuod tuod nga natabo sa ila himata didto sa Kuwait ./dyHB BACOLOD
