BACOLO CITY – Padayon karon ang imbestigasyon sang Silay City Police Station sa natabo nga pagpatay sa mag-amay pinaagi sa paglabo kag pagsunog sa mga biktima kahapon sang kaagahon sa Brgy. Kapitan Ramon, Silay City.
Nakilala ang mga biktima nga sanday Antonio Padua, 63 anyos ang edad kag ang iya bata nga si Re-ann Padua, 8 ka tuig ang edad, lunsay pumuluyo sang Had. Pula, Brgy. Kapitan Ramon.
Suno sa initial nga pagpangusisa sang Silay City PNP, ang ginatudlo nga suspek amo si Arnel Aguilar, bana sang manak ukon stepdaughter sang biktima.
Base sa imbestigasyon, na-ugot ang suspek bangud nga ginapabulag ini ni Antonio kag sang iya asawa sa iya stepdaughter bangud masami niya ini nga ginakastigo.
May mga las 5 kahapon sang kaagahon nasapwan sang isa ka nakilala kay Michael Ocbina, 35 anyos ang edad, pumuluyo man sang amo nga lugar ang bangkay sang mga biktima.
Ang mag-amay nag angkon sang pilas tuga sang pagbuno kag labo sa nagkalain lain nga bahin sang ila lawas.
Ginpahayag nga wala pa nakuntento ang suspek, iya pa ginpangsunog ang mga biktima gamit ang mga bayo nga ginkuha sini sa sulod sang balay sang mga biktima./dyHB BACOLOD
