GINPATAY, GIN-UTOD ANG LAWAS, GINSULOD SA SAKO KAG GINHABOY! | Bangkay sang isa ka tigulang nga pila ka adlaw nga nangin missing, nasapwan

911

Roxas City, Capiz – Nasapwan na sang mga kapulisan ang bangkay ni Antonio dela Rosa 62-anyos residente sang Arches Subd., Brgy. Inzo Arnaldo, Roxas City nga nangin missing humalin pa sang nagligad nga adlaw sang Byernes. Nakasulod sa duha ka mga sako ang lawas ni dela Rosa kun sa diin gintunga ini sa duha ka parte kag ginhaboy sa kilid sang dalan sa Sitio Bato, Barangay Banica, Roxas City. Una nga ginbuksan sang mga katapo sang SOCO/Capiz Crime Laboratory ang sako sang feeds nga nakasulod ang naibabaw nga parte sang lawas sang biktima. Ginsunod sa pagbukas ang ikaduha nga sako kun sa diin nakasulod naman ang duha ka mga tiil ni dela Rosa. Nagakaagnas na ang amo nga bangkay bangud pila na ini kaadlaw nga ginpatay.
Na-recover sang Roxas City PNP ang bangkay sang biktima matapos makumbinser sang mga imbestigador ang suspek nga si Antonio Eduardo alyas Tony Balila, 67-anyos kag residente sang Brgy. Inzo Arnaldo Village, Roxas City nga itudlo sini kon sa diin niya ginhaboy ang bangkay sang biktima.
Sa madumduman nga gindakop kahapon nga adlaw sang Roxas City PNP ang suspek nga si Antonio Eduardo matapos ginatudlo sang pamilya nga suspek sa pagpatay kay Antonio dela Rosa. Na-recover sa balay ni Eduardo ang bike ni dela Rosa, nga amo ang nagpabakud sa pagpati sang pamilya dela Rosa nga si Eduardo ang nagpatay sa biktima.
Bangud sa pagnikasog sang mga imbestigador sang Roxas City PNP, nag-ako ang suspek nga ginpatay sini ang biktima bangud sang iya tuman nga kaakig.
Sa exclusive interview sang DYVR RMN Roxas kay Antonio Eduardo, gintuad sini nga nakumiter niya ang krimen matapos nga ginhimuslan sang makaduha ka beses ni Antonio dela Rosa ang iya asawa.
Ginplano sini ang pagpatay kun sa diin sang nagligad nga adlaw sang Byernes, Marso 9, gintawag sini ang biktima sa ila poluy-an. Wala na sang kon anu pa nga estorya, ginlampusan ni Eduardo sang makapila ka beses sa ulo si dela Rosa gamit ang isa ka martilyo tubtub mapatay ini.
Bangud indi mag-igo sa isa ka sako ang lawas sang biktima, Gin-utod sini ang duha ka tiil sang biktima kag ginsulod sa isa pa gid ka sako. Agud indi gilayon magbaho, ginputos anay sang garbage bag ang utod nga lawas sang biktima antes ginsulod sa sako.
Ginkarga sa tricycle ang duha ka mga sako kag ginhaboy sa kilid sang dalan sa Sitio Bato, Brgy. Banica, Roxas City sang nagligad na nga adlaw sang Sabado. Ginpahayag ni Antonio Eduardo nga wala man ini naghinulsol sa ginbuhat sini nga krimen.

Facebook Comments