BACOLOD CITY – Kapin P10 mil pesos nga balor sang mga bayo ang natigayon nga madagit sang suspek nga nagsalisi sa duha ka mga biktima kahapon sang aga sa isa ka balaligyaan sa downtown area, dalan Locsin sining ciudad sang Bacolod.
Nakilala ang mga biktima nga sanday Irene Manaay, 34 anyos ang edad, kasado kag pumuluyo sang East Home 2, Brgy. Estefania, Bacolod City kag si Mary Jean Cepeda, 30 anyos ang edad, pumuluyo sang Purok Mahogany, Brgy. Calumanggan, Bago City.
Suno sa Police Station 1, may mga las 11 Biyernes sang aga, ang amo nga mga biktima ang nagsulod sa isa ka bazaar sa amo nga lugar bitbit ang mga plastic sang ila ginpangbakal nga pantalon kag bayo.
Sang buot na kuntani nga ibilin sang mga biktima sa counter ang ila plastic bag, ini sila ang gin approach sang suspek kag nagsiling nga indi na nila kinahanglan magkuha sang number sa counter kag ibilin na lamang sa kilid.
Matapos ang halos 30 minutos nagbalik na ang duha kag didto ila natukiban nga wala na ang plastic sang ila mga ginpang-shopping./dyHB BACOLOD
