BACOLOD CITY – Ginlabo sang isa ka lalaki ang iya kaugalingon nga bayaw bangud sang kaakig kahapon sang aga sa Brgy. Vista Alegre, Bacolod City.
Nakilala ang biktima nga si Richard Cruz, 32 anyos ang edad, pumuluyo sang Had. Gaston, Purok Kabulakan, Brgy. Vista Alegre, samtang ang suspek naman nakilala kay Jose Rotas, 28 anyos ang edad, pumuluyo man sang amo nga lugar.
Ginpahayag sang biktima nga may mga las 11:50 kahapon sang aga, nagpangakig ang iya bayaw bangud nga ginsipa niya ang bata nga lalaki sang suspek.
Suno sa imbestigasyon, nagkuha sang ispading ang suspek kag ginlabo ang biktima nga naigo naman sa abaga kag butkon.
Samtang, nadimalasan naman ang suspek matapos niya nga nalab-an ang iya kaugalingon kag naigo ini sa iya wala nga tuhod.
Lunsay ginpangdala sa Corazon Locsin Montelibano Memorial Regional Hospital ang biktima kag suspek samtang padayon nga gina-imbestigar sang Police Station 7 ang amo nga hitabo./dyHB BACOLOD
