BACOLOD CITY – Ginpa-blotter sang isa ka soltero ang isa man ka police nga iya ginreklamo nagsumbag sa iya sadtong nagligad nga Domingo sa atubang mismo sang Police Station 2.
Si Dranreb Valdez, 31 anyos ang edad, isa ka soltero kag pumuluyo sang ciudad sang Bacolod ang nagpadulong kahapon sa Police Station 2 agud nga ipa-blotter ang isa ka police nga suno sa iya nagsumbag sa iya sang isa ka bes mga las 2 sang hapon sadtong Domingo, January 13.
Suno kay Valdez nga sang amo nga adlaw ini siya ang magakadto kuntani sa iya asawa sa Brgy. Villamonte, apang sang ini siya ang nag-agi sa atubang sang Station 2, hinali na lamang ini nga gintawag sang duha ka mga police, ginpasulod sa estasyon kag ginpusasan.
Wala labot sini, ginsiling sang complainant nga ini siya ang ginsumbag pa sang isa ka pulis nga wala niya nakilala.
Pahayag ni Valdez nga nagapati siya nga ang rason kon ngaa ini ang gindakup kag ginsumbag amo nga nasal-an ini siya nga isa ka asset.
Wala pa nakahatag sang komento ang hepe sang Station No. 2 angot naman sa reklamo ni Valdez. /dyHB BACOLOD
