KABANKALAN CITY, NEGROS OCCIDENTAL – Ginsunog sang mga nagpakilala katapo sang New People’s Army ang backhoe kag bunkhouse sang isa ka construction company sa Sitio Tagbak, Brgy. Tan-awan, Kabankalan City sadtong Lunes sang gab-i.
Suno sa mga naka-kita sa amo nga lugar, may kapin 50 ka armado nga mga tawo ang nagsulod sa F. Gurrea Construction and Company kag ginsunog ang mga heavy equipment nga yara sa sulod.
Ginpahayag nga ang ini nga construction company ang may proyekto nga ginapatigayon para sa National Irrigation Administration ukon NIA.
Samtang, ginpahayag naman sang hepe sang Kabankalan City Police Station PSupt. Rhea Santos nga ginpalapitan sang armado nga mga lalaki ang driver sang backhoe nga si Joselito Rivera kag ang foreman nga si Delfin Francisco kag ginhambalan nga wala sila sang labot kundi ang ila employer ukon “amo” ang may sala sa NPA.
Wala labot sa backhoe, ginsunog man sang mga rebelde ang generator, battery, mixer kag iban pa nga mga kagamitan.
Suno naman sa kompaniya naglab-ot sa mga P6.8M ang damage sa amu nga hitabo. /dyHB BACOLOD
