BACOLOD CITY – (2nd Update) Ginahanda na karon sang pulis ang kaso nga murder igapasaka batuk sa isa ka amay nga nag tiro patay sa lalaki nga nagapangaluyag sa iya bata kahapon sa Brgy. Vista Alegre, ciudad sang Bacolod.
Ang suspek nga si Eduardo Diego, 64 anyos ang edad, kasado kag pumuluyo sang Purok Hardin, Brgy. Taculing sining ciudad sang Bacolod ang gilayon kag boluntaryo nga nagsungka sa Police Station 7 matapos niya sini gintiro ang biktima nga si Bernie Casidad, 31 anyos ang edad, single, isa ka call center agent kag pumuluyo sang Purok Sunrise, Brgy. Taculing.
Ang insidente natabo mga las 12:45 kahapon sang udto sa Villa Nena Subdivision, Brgy. Vista Alegre.
Si Bernie ang gin-declare dead on arrival sa ospital matapos ini nag-angkon sang anum ka igo sang bala sa nagkalain lain nga bahin sang iya lawas.
Suno sa imbestigasyon kag base sa pahayag sang suspek makapila ka beses na niya nga ginpaandaman ang iya bata nga kasado man sa isa ka seaman, apang nagbulagay, nga indi pag-intertinaron si Bernie bangud may pamilya na ini kag nakita niya nga indi man sensiro.
Naghambal pa ini sa iya bata nga patyon niya ang lalaki sa tion nga iya ini makit-an.
Pamatyag sang amay nga ginapangwartahan lang ni Bernie ang iya bata bangod ang motor gani nakapangalan pa sa lalaki basi sa OR/CR.
Sa karon detained na sa custodial facility sang Police Station 7 si Tatay Eduardo matapos ini nga nagsungka bitbit ang iya .38 kalibre nga pistola./Albert Giner photos/RMN
