ILOG, NEGROS OCCIDENTAL – Gintiro sang duha ka mga suspek ang isa ka barangay tanod sa banwa sang Ilog kaina sang kaagahon.
Nakilala ang biktima nga si William Arellano, 47 anyos ang edad kag pumuluyo sang Purok Masinadyahon, Brgy. Galicia, Ilog samtang wala naman makilala ang duha ka mga suspek.
Base sa pagpangusisa sang Ilog Municipal Police station, may mga las 5:30 kaina sang kaagahon samtang ang biktima ang nagalakat sa dalan hinali na lamang ini siya nga gintiro sang duha ka mga nga may tabon ang guya nga suspek.
Bangud sini, nag-angkon sang pilas sa iya wala nga dughan kag wala nga bahin sang ulo ang biktima matapos gintiro sang mga suspek gamit ang 12 gauge shotgun.
Dali-dali nga gindala sa Lorenzo Zayco District Hospital sa Kabankalan City ang biktima samtang nagpalagyo naman ang mga suspek.
Sa karon padayon pa ang imbestigasyon nga ginapatigayon sang Ilog PNP./dyHB BACOLOD
