General Santos City—daw sa dili makatuo ang 16 anyos, Gold Medalist Junior Boxer nga si Kenneth Dela Peña nga taga Barangay Apopong ning dakbayan sa dakong regalo nga ihatag kaniya ni Boxing Senator Manny Pacman Pacquaio nga mao ang House and Lot.
Dako ang kakurat si Dela Peña (midula sa 46-kilogram) human nasayran nga siya hatagan ni Pacman ug balay ug yuta butang nga gipasalamatan niini ug sa tibuok niyang pamilya.
Kahinumduman nga si Keneth nakasakmit ug bulawang midalya sa gipahigayong ASBC Asian Confederation Junior Boxing Championship nga gihimo sa Puerto Princesa Palawan Coliseum human iyang napildi ang pambato sa nasud Kazakhstan nga si Akilbek Mukhtarov.
Samtang gawas sa house and lot may cash incentive pa nga madawat ang batan-ong boksidor gikan kang Sen. Pacquaio. Nasayran nga makadawat usab kini ug mukabat sa P30,000.00 nga insentibo gikan sa lokal nga panggamhanan sa syudad sa General Santos.
Una na usab nga gipasidunggan sa hawanan sa konseho ang nahisgutan gumikan sa kalampusan nga iyang naangkon sa natad sa boxing ug kadungganan nga nahatagan sa syudad.
