General Santos City–Gimando na ni Sultan Kudarat Governor Pax Mangudadatu ngadto sa kapulisan ug sa militar nga nakabase sa probinsya sa Sultan Kudarat nga tutukan ang imbistigasyon sa pagbusikad sa lungsod sa Isulan nga gikamatay sa duha ka biktima ug pagkaangol sa ubay-ubay pa.
Sumala ni Governor Pax Mangudadatu nga dapat lang mahatagan ug paspas nga nasulbaran ang nahitabong krimen ug madakpan ang mga responsabli niini.
Sa karon aminado ang gobernador nga siya blangko pa sa motibo sa pagpabusikad sa bomba sa Isulan ug kung silang si kinsa ang responsabli niini.
Gibasol usab ni Governor Pax Mangudadatu ang Isulan PNP gumikan sa kaluag sa seguridad nga ilang gipatuman sa lungsod luyo paman sa pagselebrar nila sa Hamungaya Festival.
Sumala sa gobernador nga kumpyansa kaayo ang kapulisan sa Isulan gumikan dugay nang panahon nga walay nahitabong pagpamomba sa lungsod. Tungod niini sila nalutsan ug bomba diin ubay-ubay gyud ang nahimong biktima.
Aron mas mapadali ang paghatag ug hustisya sa mga biktima ug pagtumbok sa responsabli sa pagpamomba, misaad si Governor Pax Mangudadatu nga muhatag ug usa ka milyon nga ganti alang sa kapulisan ug militar nga makasikop sa tinuoray nga suspetsado sa pagpamomba.
