*South cotabato—- Gihingusgan ni South Cotabato Governor Reynaldo Tamayo Jr., nga magpadayon ang Rapid Survey form sa probinsya bisan pa man ug adunay mga pulitikong supak niini. Nasayran nga ang Rapid Survey Form pagagamiton alang sa paghatag ug Quarantine Pass nga may mga code ang tanang katawhan sa Probinsya. Tumong niini nga dali na lamang ang pag- trace sa higayon adunay mag positibo sa virus.*
*Saysay niya nga nauna ng gi-aprubahan sa Inter-agency Task Force South Cotabato ang maong lakang lakip na ang tanang mayor sa probinsya, apan nakaabot na lamang kaniya ang impormasyon nga gipang-uli ang mga form gumikan nagpahigayon ug panagpulong ang mga mayor nga dili kapartido ug misupak sa maong aksyon.*
*Pagpaklaro ni Governor Tamayo nga walay problerma sa katawhan gumikan suportado nila ang maong rapid survey kundili ang problema anaa sa mga opisyal.*
*Dugang pamahayag niini nga dili na niya hinganlan pa kung si kinsa nga mga opisyal ang nagababag sa pag-implementar sa maong rapid survey apan nasayud na matud pa ang mga kapitan nga nagadawat ug 3mil ug usa ka libo aron nga dili kini tumanon.*
*Hagit niya sa mga opisyal sa probinsya nga maghimo ug aksyon o maghatag ug solusyon aron nga makahatag ug proteksyon sa ilahang katawhan ug iyaha kining i-respeto.*
*Andam matud pa siya nga manubag sa korte sa unsa mang resulta sa iyahang ginapatuman sa probinsya higayon nga siya pasakaan ug kaso.*
*Kalabot niini, gibutyag ni Tamayo nga adunay usa ka 75 anyos nga babaye nga gikan sa Panabo ang nakasulod sa probinsya partikular na sa syudad sa Koronadal.*
*Pamahayag niya nga walay isolation facility ang Koronadal nga pwedeng kabutangan sa nahisgutang 75 anyos nga babaye kun ugaling kini makit-an pinaagi sa contact tracing.*
*Gani, hangtud sa karon, walay quarantine facility ang Koronadal nga pwedeng kabutangan sa mga na-stranded nga mga OFW nga gitakdang muabot. *
