South Cotabato–Gipaniguro karon ni South Cotabato Gov. Reynaldo Tamayo nga mahatagan na sa ilang mga food packs ang mga nagkinahanglang mga residente nga apektado sa gipatuman nga lockdown og community quarantine sa probinsya.
Sumala ni Tamayo nga sa pagkakaron, hugot pa gihapon ang ilang implementasyon niini tumong nga walay mahimong positibo sa maong virus sa tanan nilang mga munisipyo.
Gani naghiusa matud pa ang tanang mga mayor sa probinsya sa ilahang direksyon aron masiguro ang full implementation sa total lockdown.
Sa obserbasyon ni Governor Reynaldo Tamayo sa pagpatuman sa total lockdown sa ilang probinsya sagad matud pa sa mga residente ang nagatuman niini.
Usa sa mga gihimong lakang sa lokal nga kagamhanan ang paggamit og quarantine pass sa diin usa sa matag usa ka pamilya angt mahimong mugamit niini aron makapalit sa panginahanglanon.
Bisan ang mga pampublikong transportasyon sama sa bus, van og traysikel gidid-an gihapon sa pagbyahe sulod sa 14 ka adlaw.
Giangkon usab ni South Cotabato Gov. Tamayo nga gidid-an na pagpasulod bisan ang mga trabahante sa ilang probinsya nga residente sa Sultan Kudarat nga kasikbit nilang lugar.
Gani bisan ang mga gikan sa Gensan og Sarangani gibawalan man usab tungod sa total lockdown.
Kahinumduman nga gisugdan ang maong lakang sa probinsya niadtong petsa 21 sa Marso og mahuman kini sa petsa 14 sa Abril. (Jordan Britos)
(Photo Credit to: Provincial Government of South Cotabato FB Page)
