Uyon si Misamis Oriental Governor Bambi Emano sa panawagan sa kasundalohan sa 58th Infantry Battalion nga mobalik na sa sabakan sa gobyerno ang mga rebelde.
Matud sa gobernador nga dili makab-ot ang hingpit nga kalinaw sa Mindanao ug bisan asang dapit sa Pilipinas pinaagi sa pagbitbit sa armas.
Kini ang gipahayag sa gobernador human nanawagan ang 58th Infantry Battalion nga naka-base sa Claveria, Misamis Oriental nga unta mabuksan na ang panghunahuna sa walhong grupo nga makig-alayon na lamang sa kalihukang pangkalamboan ug buhian na ang armas nga maoy babag sa paglambo sa katawhan.
Nasayran nga sa mga buot motahan sa ilang kaugalingon, dunay programa nga nakatakda alang niadtong mga miyembro sa walhong grupo.
Lakip niini nga programa ang sa Department of the Interior and Local Government nga E-CLIP kon Enhanced Comprehensive Local Integration Program alayon sa Joint Memorandum Circular No. 2018-01 nga gipagawas niadtong Hulyo singko ning tuiga.
Tumong sa programa nga kahatagan sa higayon ang mga rebelde nga buot nang magpakabuhi nga malinawon ug layo sa kagubot ug peligro sa kinabuhi.
Dunay programa sa panginabuhian kon livelihood, housing, medical assistance ug uban pa.
Nagtuo si Gobernador Bambi Emano nga kini ang usa sa maayong programa nga angay ngadto sa kaigsuonan tang rebelde tungod kay gawas nga magmalinawon ang ilang pagpakabuhi, mas mahimong malambuon pa ang kahimtang sa ilang tagsa-tagsa ka pamilya.
