Davao City – Upat ka mga drug personalities, usa ka government employee ug numero 1 nga Municipal target ang gikasuhan og paglapas sa RA 9165 human nasikop sa sunod-sunod nga operasyon sa Philippine Drug Enforcement Agency (PDEA-XI).
Sa interbyu sa DXDC RMN Davao kang Noli Dimaandal PDEA XI spokesperson, dul-an sa P8M ang sumada sa shabu nga nasakmit sa managlahing operasyon sa Davao Region nga ilang gilusad.
Gikasuhan usab og paglapas sa RA 9165, ang usa ka government employee nga giilang si Mae Cinderella Mantalaba, 47 anyos, Job Order sa Provincial Capitol sa Davao del Sur ug residente sa Barangay Coronon, Sta. Cruz, Davao del Sur, human aaresto sa buy-bust operation niadtong Hulyo 31, 2021 sa Sitio Patulangon, Barangay Zone 1, Sta. Cruz, Davao del Sur.
Nakuha sa posisyon sa suspek ang duha ka dagkong pakete o 14 gramos sa shabu nga adunay P210,000 ang street value.
Samtang, sikop ang duha ka mga big time drug pushers nga sila Roy Matulac Matabiog, alias Poloy ug Ranulfo Angoy Sacayan Jr., alias Ron, samtang 11 ka mga pakete sa shabu ang nakuha sa mga suspek nga mukantidad sa P7.6M sa Purok Tambis, Barangay Cagangohan, Panabo City, Davao del Norte.
Dakpan usab ang gikonsidera sa PDEA nga pinakaidlas nga drug suspek sa Digos City human gisilbi ang warrant of arrest tungod sa paglapas sa RA 9165.
Matud ni Dimaandal, nakaikyas si Jevelon Orcullo kinsa subject sa buy-bust operation niadtong September 28, 2020 sa Barangay San Miguel, Digos City, Davao del Sur apan gikasohan gihapon kini tungod sa pagpayuhot og illegal nga droga.
Mga dinakpan detinado na sa detention facility sa PDEA XI.
RadyoMaN Aimee Guinita
