Quebrantao el dos pies y ya tene contusion na cabesa y cuerpo del un grade ten estudianta del Divisoria National High School despues este ya salta na over-pass del Divisoria enantes aga.
Con el victima ya conose como si Richilyn Escorial, 15.
Asegun tiene problema na familia si Escorial si porque ya comete le consu acto.
Hora de recess alas 10 del aga cuando ya sale na escuela si Escorial y ya anda este na over-pass y ya subi.
Tiene cuantos persona ya mira pa con Escorial cuando ariba este del over-pass pensaba sila ay travesa lang este pero ya espanta sila cuando ya man taclas este na maga tubu amboslao del over-pass ariba y ya salta este pa abaho.
Cuando ya cay si Escorial ya dale una su dos pies na calsada y ya tumba este paculub.
Dayun ya reporta el incidnete na pulis y ya responde tambien el ambulancia y ya carga con este para na hospital.
Salvao ya na peligro el victima pero quebrao su pies y tiene maga contusion na cabesa y na cuerpo.
Asegun ta regaña con este su mayores cay recio este ta camina y hinde na ta bolbe na casa.
