Davao City – Dead on the spot ang 17-anyos nga lalaki sa disgrasya tali sa truck ug motorsiklo sa Sitio Pamuhatan, Brgy. Marilog, Davao City alas-7:40 kaganinang buntag, Marso 6, 2020.
Giila sa Marilog PNP ang namatay nga biktima nga si alyas Gerald, 17-anyos samtang angol ang kauban niining back rider nga si alyas Lanie, 15-anyos, puros grade 10 students ug susamang residente sa Sitio Kulafo, Arakan Cotabato.
Subay sa imbestigasyon, nagpadulong sa Davao ang trailer truck nga gimaneho ni Glen Payot, 39-anyos sa dihang nawad-an sumala pa kini og kontrol sa kurbada nga bahin rason nga natumba kini ug mibangga sa kasugat nga motorsiklo nga miresulta sa kamatayon sa biktima.
Daling gidala sa ospital ang ‘injured’ nga biktima samtang gikustodiya na sab sa Marilog Police Station ang driver sa truck.
Gitataw sa DXDC RMN Davao ni Police Captain Dave Uddin, Office-in-charge sa Marilog PNP nga wala nagkulang ang kapulisan sa pagpahimangno sa mga motorista pinaagi sa pagbutang og mga ‘warning signs’ aron kalikayan ang mga disgrasya sa dalan sa maong lugar.
RadyoMaN Kirby Manzon
