Granada nakaplagan sa mag-uuma sa Malalag, DavSur

Davao City – Anaa na karon sa kustodiya sa Provincial Explosive Ordinance Disposal-Canine Unit (PECU) sa Davao del Sur ang usa ka granada nga nakaplagan sa kasagbutan nga bahin sa Barangay Rizal, Malalag, Davao del Sur niadtong Sabado sa buntag (Hulyo 9, 2022).

Sumala ni Police Senior Master Sergeant (PSMS) Rodina Gamido, Duty Investigator sa Malalag Municipal Police Station (MPS), paingon sa iyang umahan si Dennis Aquino, 35 anyos, ug residente sa Purok 3, Barangay Rizal, Malalag, sa dihang nakit-an niini ang usa ka hand grenade ug iyaha gilayong gireport sa awtoridad.

Giadtoan usab dayon sa Malalag MPS ang lugar ug wala gipaghilabtan ang butang ug didto nakumpirma nga kini usa ka MK2 Fragmentation Hand Grenade.

Nagpahimangno ang awtoridad sa publiko nga dili hilabtan kung makakita og eksplosibo, inay ireport gilayon sa kapulisan, ingon man pag-report sa mga pusil, granada, ug bisan unsang matang sa armas nga dili lisensyado.

RadyoMaN Kirby Manzon

<www.avast.com/sig-email?utm_medium=email&utm_source=link&utm_campaign=sig-email&utm_content=webmail>