Agtultuloy a lumawlawa ken puminpintas ti Greenwall ti Ilocos Norte nangnangruna iti ili a Solsona. Daytoy ti impannakkel ni Mr. Hasler Garalde ti Environment and Natural Resources Office.
Segun kenkuana, tawen 2012 a nangrugi ti nasao a proyekto kas paset ti “greening program” ti gobyerno probinsyal iti liderato ni Gob. Imee Marcos.
Inbunannagna nga iti agdama ket sumuruk kumurang a sangaribu nga ektaria ti plantasyon iti nadakamat nga ili nga adda iti sakop ti barangay Manalpac, Maan-anteng ken barangay Sta. Ana. Karaman iti kabangibang nga ili a pakadanunan iti nasao a proyekto.
Ditoy a makita ti nagdaduma a mula kas ti niyog, rambutan, lanzones, guyabano, native a manga, kape ken daddumapay.
Malaksid kadagitoy, kunana nga adda pay dagiti naimula a “forest/timber species” wenno dagiti saan nga agbunga a kaykayo para iti rehabilitasyon dagiti agkalkalbon a “watershed areas”.
Ti nasao a proyekto ket banbantayan ti barangay ranger officers wenu BRO a naidistino iti kabanbantayan ti Solsona, tapnu maliklikan pay tin pannakadadaelna daytoy nangnangruna ti oram.
Bernard Ver, RMN News
