Groundbreaking ceremony, gipahigayon sa Phase VI sa Resettlement program sa probinsyal nga pangagamhanan sa Bukidnon

Malampusong napahigayon ang groundbreaking ceremony sa Phase VI sa Resettlement program sa probinsyal nga pangagamhanan sa Bukidnon didto sa Purok-17, Landing, Barangay Casisang, Malaybalay City, kaganiha sa buntag.

Gikatahong muabot sa 41 ka mga housing units ang pagatukoron sa maong lugar alang sa mga pili nga mga benipisyaryo nga nawad-an og mga puluy-anan.

Mukabat sa kapin P23M ang pondo nga gigahin sa probinsya alang sa katukuran sa maong mga housing units.

Gipangunahan sa probinsyal nga pangagamhanan sa Bukidnon ang maong seremonya pinaagi kang OIC-Provincial Administrator Atty. Paul Vincent G. Villegas inubanan nila Provincial Budget Officer Fe C. Retuertas, Provincial Engineer Albert Yulo, ug si Malaybalay City Mayor Atty. Jay Warren S. Pabillaran.

Mapasalamaton ang mga benipisyaryo sa maong programa, ug gikaingong wala gayud sila nawad-an og paglaum nga matinood gayud ang ilang mga pangandoy ilabi na ang pangandoy nga makaangkon og kaugalinong pinuy-anan.

Mipasalig ang probinsyal nga pangagamhanan nga padayon ilang pagpaningkamot sa pagmugna og mga proyekto alang sa katawhan ilabi na ang mga resettlement program.