Grupo sa lokal nga terorista, posibleng maoy namusil sa mga sundalo sa Lanao del Norte

37

Posibleng grupo, matud pa, sa lokal nga terorista ang anaa sa likod sa pagpamusil, nga gikamatay sa tulo ka mga sundalo sa Lanao del Norte niadtong Huwebes sa buntag.
Matud pa ni Maj. Salman Saad, information officer sa Provincial Police Office-Lanao del Norte, kini base na usab sa pamahayag sa mga nakasaksi nga lima hangtud sa unom ka mga armadong lalaki, nga nagsuot og itom nga susama sa mga ISIS fighters ang mitira sa mga sundalo.

Nag-sibilyan lang niadtong tungora ang mga sundalo sa 4th Mechanized Infantry Battalion, dihang gipamusil sila sa mga suspek samtang mitabok sa suba sa Radapan, Poona Piagapo, mga unom ngadto na sa pito ka kilometro ang gilay-on sa ilang detachment sa Barangay Tangclao. 
Nadamay pa ang 18 anyos nga sibilyan nga nakadungan sa pagtabok sa suba. 


Paingon unta sa ilang battalion headquarters ang mga biktina aron mag-sumite sa ilang Statement of Assets Liabilities and Networth o SALN report ug mamalit sa ilang pagkaon. 

Ang detachment sa tulo nga naa mahimutang sa Barangay Tangclao, duol sa mga daluna sa Lanao del Sur ug Lanao del Norte diin ilang gibantayan nga dili makasulod sa Lanao del Norte area ang lokal nga grupo sa Dawlah Islamiya.

Niadtong Biyernes sa gabii, usa ka necrological service ug tribute ang gibuhat sa tropa sa 4th Mech ug 2nd Mechanized Infantry Brigade alang ngadto sa tulo sulod sa kapilya sa 2nd Mech sa Barangay Maria Cristina, ning dakbayan sa Iligan.

Sabado sa buntag gibyahe sila paingong ngadto sa ilang tagsa-tagsa ka mga pinuy-anan sakay sa C130 sa Philippine Air Force: Si Cpl Albert Saura paingon sa iyang pinuy-anan sa Maitum, Sarangani; si Cpl Bryan Binayug sa Solana, Cagayan Valley; ug Pfc Albert Soriano sa Lingayen, Pangasinan. (Divina M. Suson, January 18)




Facebook Comments