General Santos City— Padayon ang ginahimong pag-monitor sa kapulisan ngadto na sa managlahing investment scheme sa dakbayan hilabina na ang mga gika-ingong adunay daghang nabiktima.
Lakip matud pa sa ilahang gina-monitor mao ang mga insidenteng nakatawag sa ilahang atensyon sama nalang sa nahitabong pagrapido sa balay sa usa sa mga ahente sa shantal nga si Corazon Adolfo sa Brgy. San isidro milabay’ng adl aw.
Pagpaklaro ni Pol. Col. Aden Lagarante, City Director sa gensan City Police Office nga lakip kini sa ilahang tabaho ug dili pasabot nga paghatag ug proteksyon sa kinsa mang mga ahente o mga nagpa-ilang founder.
Dugang pamahayag ni Pol. Col Lagradante nga sa iyaha personal, walay miduol nga ahente o mga founder sa bisan unsang investment scheme aron mangayo ug proteksyon gumikan sa mga bahad sa kinabuhi.
Naghatag na matud pa siya ug direktiba ngadto sa intelligence branch sa GSCPO nga i-monitor usab ang operasyon sa tanang mga investment scheme nga anaa sulod sa dakbayan.
Kalabot niini, gibutyag ni Col. Lagrandante nga gawas sa Police Paluwagan Movement kon PPM, wala pay mga mitumaw nga reklamante sa iyahang buhatan kabahin na uban nga mga investment.
Apan siya nagtuo nga aduna nay mga mipatala sa managlahing presinto sa kapulisan sa dakbayan human nga nahimong biktima sa maong mga scam.
Pagpaklaro niya nga wala magkulang ang kapulisan sa paghatag ug pahimangno ngadto sa katawhan nga dili gilayong musulod sa unsa mang investment kung wala kini kasiguruan.
