Gipadayon karon sa Gulayan Sa Kabalayan kon GSK sa Center For Human Development o CHD sa University of Science and Technology of Southern Philippines o USTP Cagayan de Oro Campus ang ilang paningkamot sa pagtubag sa food security ug sustainability pinaagi sa pagpananom og gulay sa mga nataran ug mga bakanteng luna sa komunidad.
Nasayran nga pinaagi sa USTP Claveria Campus ilang giaprobahan ang halos 300-mil pesos nga budget alang sa mga aktibidad sa GSK ning tuiga.
Sa kasamtangan, ang proyekto sa GSK mao ang gitawag nga Urban Community Microfarms nga gipatuman sa Barangay Pagatpat ug Barangay Tablon ning syudad sa Cagayan de Oro.
Una niini, gihimo sa GSK ang Agriskwela webinar series niadtong Hunyo uno hangtud kwatro ning tuiga nga nagtuki bahin sa soil preparation, fertilization, seed growing ug uban pa.
Nasayran nga sa pagsugod sa pandemya, nakapanghatag ang GSK og 2,500 ka mga seed packs sa mga residente sa Cagayan de Oro lakip na sa mga miyembro sa Talaandig indigenous community sa Talakag, Bukidnon.
Matud ni Angelie Azcuna Collera, Head sa CHD sa USTP ug usa sa mga founders sa GSK nga pinaagi sa ilang pagpanghatag sa seed packs, daghan ang nakapananom sa ilang nataran.
Gidugang ni Collera nga ang pagpananom nakahatag sa maayong epekto sa mga kabataan ilabina sa pagsugod sa pandemya kung asa dili pwedeng makagawas sa balay ang mga menor de edad.
