GUMIKAN SA UTANG NA P220, ISA KA 22 ANYOS NA LAYAKI TAGPUSIL SA BRGY. DAY-ASAN, SURIGAO CITY
Tagkilaya an biktima na si Elmer Pabillan Bobotan, 22 anyos, isa ka habl-habal driver ug nakaangkon nan igo-pinusilan sa may tuhod niini. An suspek tagtudlo na si Arnold de Guzman Escrupolo, 26 anyos. Gamit sa pagpamusil an isa ka sumpak o improvised shotgun.
Sa inisyal na imbestigasyon nan PNP, namahayag an Chief of Police na si Supt. Jay Baybayan, mga alas 4:00 sa hapon kahapon, an anak ni Brgy. Kapitan Ruben Catarman an notawag ug nagpakitabang gumikan sa isa ka insidente sa pagpamusil.
Tagtudlo na una na nolabay an suspek ug live-in partner niini sa may tulay dapit sa panimayay nan biktimang si Bobotan, nanukot sa utang na P220.00 na miresulta sa isa ka mainiton na lalis sa isig ka live-in partner. Sunod niini, miuli sa ila panimayay si Escrupolo pero pagbalik an may daya na sumpak ug amoy taggamit sa pagpamusil.
Human sa pagpusil an misuway pa sa pag-ikyas si Escrupolo gamit an tagkarnap na motorsiklo sa isa sa mangaliguay sa Brgy. Day-asan pero nadakpan ra ini sa may Brgy. Cagniog pinaagi sa pagharang nan Traffic Enforcer Sergio Maceren na nagbantay sa Undas 2017 dapit sa may Surigao Memorial Park.
Sa pagkakuman, an biktima na si Bobotan an kasamtangang nagpatambay sa Caraga Regional Hospital samtang an suspek an tagdetinir sa City PNP, tagtakda sang-atan nan kaso.
