BACOLOD CITY – Ginbuno ang isa ka lalaki nga nagkadto sa Barangay 2 agud nga mag “score” kaina sang kaagahon.
Nakilala ang ginbuno nga si Jay-R Grijaldo, 36 anyos ang edad, single kag pumuluyo sang Purok Pag-isa, Brgy. Bata, Bacolod City.
Suno sa imbestigasyon, may mga las 3:20 kaina sang kaagahon nagpadulong sa Purok Sto. Niño Stop, Brgy. 2 si Grijaldo kon diin iya gin-ako nga nagkadto siya didto agud nga mag “score.”
Apang sa iya pag-abot didto, naglalisay ini sila sang duha ka mga tawo nga iya lamang nakilala kay Alyas Tanoy kag Alyas Kevin.
Ginsiling ni Jay-R nga nakibot siya sang hinali na lamang ini nga ginbuno sang mga suspek kon diin naigo ini sa iya wala nga abaga kag wala nga kilid.
Sa karon ang biktima padayon confined sa Corazon Locsin Montelibano Memorial Regional Hospital./dyHB BACOLOD
