Naka-lockdown na karon ang palibot sang rural bank sa Brgy. Dancalan, banwa sang Ilog kag kaiping nga lugar matapos nga ang isa ka security guard sang amo nga bangko ang gina-suspetsuhan nga patient under investigation (PUI).
Ginpahayag ni Punong Barangay Leonardo Loquinario nga kahapon (Martes) samtang nga naga-duty ang amo ng gwardiya ang hinali ini nga nalipungan kag gindala sa Kabankalan District Hospital kag gin-abisuhan sang Ilog Rural Health Unit nga magpaidalum sa swab test.
Siling ni Loquinario nga vulnerable ang gwardiya sa virus bangud sari-sari nga tawo ang iya ginaatubang adlaw-adlaw.
Suno sa asawa sang gwardiya nga pila ka adlaw na nga nagahilanat ang iya bana apang ginadala-dala gid lamang niya ini kag padayon nga nag-duty.
Sa karon confined na sa ospital ang gwardiya kag ginahulat na lamang ang resulta sang test agud mahibaluan kon bala ang hilanat niya ang sintoma sang virus ukon indi.
[image: image.png]
