Wala makuha sa mga tulisan ang P 2 million nga dala sa manager sa East West Bank sa dihang gitulis sila sa lungsod sa Buenavista kagahapon.
Gipahayag ni Police Senior Inspector Calvin Placer, hepe sa Buenavista PNP nga ang itom nga bag nga mauy nadala sa tulisan dili mao ang gisudlan sa salaping cash.
Ang P 2 million nga salapi gibutang likod sa gilingkoran sa security guard nga si Jessie Lumanao kinsa napatay sa maong insidenti.
Padayung giatiman sa usa ka pribadong Hospital ang manager sa East West Bank sa lungsod sa Nasipit, Agusan del Norte nga si Noreyev Barsobia human nakaangkon ug samad pinusilan sa dihang gitulis kagahapon sa hapon didto sa crossing brgy. Agong-ong, Buenavista, Agusan del Norte.
Sa maong insidenti, dead on the spot ang security guard nga si Jessie Lumanao human nakaangkon ug samad pinusilan sa dughan ug ulo.
Nigawas sa imbistigasyon nga gikan sa dakbayan sa Butuan ang duha ka mga biktima sakay sa L300 Van apan paghidangat sa crossing Agong-ong, lungsod sa Buenavista gibabagan sila sa tulo ka mga suspek nga nagkasay ug motorsiklo ug gipusil sa makadaghang higayun gamit ang .45 nga pistola.
Daling misibat sa wala masayring direksyon ang tulo ka mga suspek human sa krimen.
Sigun sa mga nakasaksi, adunay kolor itom nga bag ang gikuha sa mga tulisan apan hangtud karon wala pa masiguru sa kapulisan kung unsay sulod niadto.
