General Santos City–Kasong pagsupak sa sec 5 sa Art II sa RA 9165, (Comprehensive Dangerous Drugs Act Of 2002) ang atubangpon sa usa ka gwardya nga si Hassle De Jesus Padayao alyas Macmac, 29 anyos, minyo ug nanimuyo sa Prk. 2, barangay Katangawan ning syudad human nga masikop kini sa gipahigayon nga buy-bust operation sa mga personahe sa Police Station 3, alas 11:55 ang takna sa gabie sa usa ka kwarto sa Chico Inn, nga nahimutang sa Zone 4 , Prk. 19 Barangay Lagao.
Sumala pa ni Police Lieutenant Felix Minion III, ang Deputy Chief Of Police sa Police Station 3 nga subra usab usa ka simana nga gimonitor ang nahisgutang suspect nga naga payuhotan ug iligal nga droga ug una na kini gisuwayan ug buy-bust apan idlas matud pa kini.
Apan niadtong milabay nga gabie mikagat kini sa ilahang giplastar nga operasyon hinungdan nga nasikop kung asa napalitan kini ug usa ka sachet sa gikatahapang shabu ug nakuha sa iyahang posisyon ang 500 pesos nga mark money.
Dugang pa ni Minion nga sa karon ilahang namatikdan nga ang mga drug pushers ang naga-gamit na matud pa ug mga lodging house aron sa pagbaligya ug ilahang mga item aron nga lisod matud pa sila dakpon hinungdan nga ang kapulisan matud pa ang nagahimo na usab ug bag-ong approach sa operasyon aron sa pag sikop sa mga nahisgutan.(Dave Silagan)
(Photo is For Illustration Only)
