General Santos City–Gitutukan karon sa Polomolok PNP ang pag-imbistigar sa kaso sa pagpamusil sa biktimang si Jenny Usop Abpit, 49 anyos, habal-habal driver nga residenti sa purok 6, barangay Koronadal Proper, Polomolok, alas 9:00 sa buntag.
Una nang gipusil ang biktima sa waiting shed nga bahin partikular sa terminal sa mga habal-habal driver sa may Crossing Palkan, Polomolok, sa duha ka mga tawong nakamotorsiklo.
Sumala ni Police Sr. Inspector Romeo Albano, deputy Chief Of Police sa Polomolok PNP nasuta nga nagtambay ang biktima sa lugar dihang kalit kining giduol sa suspek ug gipusil sa ulo nga bahin. Milapos ang bala nga miigo sa bystander nga si Panny Panalangan, 66 anyos nga taga Barangay South, Gensan.
Gitiwasan pag pusil sa mga suspek ang biktima igo sa iyang ulo ayha kini misibat sakay sa usa ka Mio, kolor yellow nga motorsiklo padulong sa dereksyon sa Polomolok.
On the spot patay ang biktimang si Abpit, samtang daling gidala sa pinakaduol nga ospital si Panalangin human nga nakaangkon ug samad sa iyang abaga nga bahin. Hinuon luwas na sa kuyaw nga kahimtang ang biktima ug kasamtangan nalang karon nga nagpaalim sa iyang samad nga naangkon.
Usa sa mga anggulong gitutukan karon sa Polomolok PNP mao ang personal grudge ug pagpanimalos.
Nasayran nga si Abpit nag-atubang ug kasong murder human siya maoy gitudlong prime suspek sa pagpatay sa usa ka mr. Gurit kansa una nang gipusil patay niadtong ikatulong simana sa bulan sa Oktobre.
Nasayran nga si Abpit maoy gitudlo sa mga testigo nga mipusil sa biktima diin unang motibong naestablisar sa kapulisan mao ang may kalabutan sa away sa luna sa ilang lugar.
