Halfway house para sa mga former rebels sa South Cotabato itukod na sa Brgy. Tinongcop.

Itukod na sa area sang Animal Production and Processing Center sang provincial government sang South Cotabato sa bahin sang Barangay Tinongcop sa banwa sang Tantangan ang halfway house para sa mga former rebels imbes nga sa compound sang Police Provincial Office sa Barangay Morales, Koronadal City.
Suno kay OIC Provincial Social Welfare and Development Officer Haidie Agustin ini tungod asta sa subong wala pa man sang approval sa request ang Camp Crame angot sa nasambit nga plano amo nga nangita na lang sila sang iban nga area.
Ini matapos nga yara na sa provincial government ang P5 milyones nga pondo nga halin sa Department of Interior and Local Government ukon DILG para sa itukod nga halfway house kag kinahanglan naman nga maliquidate gilayon.
Ginkumpirmar man ni Maam Agustin nga gin-inspection naman nila upod ang provincial engineering office ang lugar nga patukuran sang halfway house para sa mga nagsurender nga miyembro sang New People’s Army.
Nahibaluan nga ang halfway house ang temporaryo nga istaran sang mga former rebels samtang ginaproseso ang ila nga mga dokumento kag samtang ginapaidalom sila moral recovery, skills kag livelihood training.
Magluwas sini ginahatagan man sang livelihood kag financial assistance ang mga miyembro sang NPA dire sa probinsya nga nagbalik sa sabak sang gobyerno.