SULOD lamang sa tulo ka bulan, mikabat na sa halos 1.5 million ka mga turista ang nibisita sa Misamis Oriental alang sa second quarter ning tuiga.
Kini ang gireport ni Provincial Tourism Officer Atty. Jeffrey Saclot atol sa gihimoong Lambo Departmental Press Briefing sa milabayng Biyernes.
Matud pa ni Atty. Saclot nga gikan sa tunga sa milyon nga ihap sa turista niadtong Enero hangtud Marso ning tuiga, triple pa ang ihap niini sa bulan sa Abril hangtud Hunyo ning tuiga.
Gipahibalo usab niini nga sa maong ihap sa turistang mibisita, mikabat usab sa kapin 19 million pesos ang kinitaan sa mga tourism destinations sama sa entrance fees ug renta sa mga cottages.
Wala pay labot niini ang kinitaan sa tour guides, habal-habal drivers, gagmay’ng tindahan, pasalubong centers ug uban pa.
Gidugang ni Atty. Saclot nga ang Sagpulon Falls mikita na sa kapin 1.1 million pesos sulod sa unang unom ka bulan ning tuig.
Samtang sa Agutayan White Island adunay income nga halos 300-mil pesos tungod sa bayad sa transportasyon patabok padulong sa maong isla.
Kini ang resulta sa pagtuko sa walo ka haligi sa programang turismo ni Gobernador Bambi Emano.
