Head sang Regional Hospital ginduso sa gihapon ang community testing sa Bacolod

17

Ginaduso sa gihapon sang medical center chief II sang Corazon Locsin Montelibano Memorial Regional Hospital (CLMMRH) nga magpatigayon sang community testing sa Bacolod agud mahibaluan ang matuod nga sitwasyon sang coronavirus sa ciudad.


Ini ang reaksyon ni Dr. Julius Drilon kasunod sang panawagan sang pareho niya nga mga doktor nga ibalik sa Enhanced Community Quarantine (ECQ) ang ciudad sang Bacolod. Sa interview sang DYHB kay Dr. Drilon, ginpahayag sini nga ang pag-modify sang ginapatuman nga quarantine sa tagsa ka lugar ang isa ka political decision kag madamo ini sang mangin epekto.

Gani indi na siya luyag magkomento pa, apang nahangpan naman niya ang medical side sang panawagan.

Kasunod sini, ginsulit ni Dr. Drilon ang nauna na sini nga panawagan sa lokal nga opisyales sang Bacolod nagligad nga Mayo nga ipaidalom sa test ang kapin 30-35 mil ka mga Bacolodnon agud mahibaluan gid ang matuod nga sitwasyon sang ciudad.

Sa pihak nga bahin, ginapaabot na sang regional hospital sa madason nga semana ang dugang nga mga machines para sa molecular laboratory gani ginalauman na ni Dr. Drilon nga magasaka pa ang testing capacity sini.Sa karun, kapin sa 260 samples ang ma-process sang molecular laboratory sang regional hospital kada adlaw kag kun mag-abot ang dugang nga machines magasaka pa ang capacity sini sa 400 per day.

[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments