By: Nitz Arancon
Subli nga paminawon sa hukmanan, unyang alas 9 karon buntag ang husay sa kasong Kidnapping ug Carnaping, batok sa lima ka kanhi Police sa Cagayan de Oro, nga akosado sa pagkidnap ni Enrique Eking Fernandez, ug pag-carnap sa iyang motorsiklo, sa usa ka Condotel, sa upper Carmen ning syudad , niadtong October sa milabay nga tiuig.
Matud ni Atty. Rey Raagas, nga private Prosecutor sa pamilyang Fernandez, nga karong buntag, ipadayon ni Judge Emmanuel Pasal, sa Regional Trial Court Branch 38, ang hearing, aron suta-on sa maong husgado, kon angayan bang ipag-piyansa o dili sila si Police Senior Insp. Ereneo Ramirez, SPO2 Jojo Lim, SPO1 Alaindelon Tacubao, PO2 Sankula Hussein, PO2 Alejandro Ubanan ug ang ilang duha ka “police assets” nga sila si Federico Guevarra ug Rolando Udasco.
Matud ni Raagas, nga i-presentar karong buntag ni defense counsel Atty. Noel Vedad ang iyang mga tistigos ug mga ebedensiya, aron kombisihon ang husgado, nga ipag-piyansa ang ilang mga kliyenteng police ug asset.
Mahinomdoman nga gipangayo ni Atty. Vedad sa korte, nga hatagan sa temporaryong kagawasan ang iyang mga kliyenteng police, kay matud pa sa maong abogado, huyang ang akosasyon sa prosecution, sa kasong kidnapping ug Carnaping batok nila ni Senior Inspector Ramirez ug mga kauban.
