General Santos City—Midepensa si Police Chief Inspector Jovenson Bayona ang Hepe sa Police Station 1 sa mga isyu nga walay gihimo ang kapulisan sa Pendatun human gipusil ang usa ka traysikel driver nga si Ricardo Alijandrino, 39, residenti sa Habitat Phase-A, Barangay Mabuhay ning dakbayan duol lang sa ilang prisinto.
Sumala ni Bayona nga usa man sa iyang mga pulis ang misuway ug gukod sa mga nakamotorsiklong gunmen apan wala lang gyud niini maapsan tungod paspas nga nakaikyas ang mga suspek.
Una nang gipusil patay sa riding in tandem ang biktimang si Alejandrino samtang anaa kini sa usa ka karenderia nga gibana-banaang dili muabot sa 100 meters ang gilay-on gikan sa prisinto uno.
Dugang depensa ni PCI Bayona nga duna man usay dalang pusil ang pulis sukwahi sa migula nga mga impormasyon nga wala kini dalang armas.
Pamahayag ni Bayona nga wala lang makit-an sa mga bi-stander ang dalang pusil sa pulis tungod natabunan kini sa iyang unipormi.
Matud ni Bayona nga anaa sa 10 ngadto na sa 15 metros ang gilay-on sa mga suspek gikan sa pulis dihang gitudlo kini sa mga nakakita sa panghitabo apan luyo niini nakasibat gihapon ang mga suspek.
