Plastar na ang hugot nga security and traffic plan ning syudad sa Cagayan de Oro.
Kini alang sa himoong mga dagkong kalihukan alayon sa kapistahan ni Señor San Agustin.
Sa gihimong briefing kagahapong adlawa, makuting gituki ang fiesta security and traffic plan nga giandam sa Cagayan de Oro City Police Office kon COCPO ug Roads and Traffic Administration o RTA.
Tumong niini nga andam kanunay ang mga otoridad pagseguro sa hapsay nga dagan sa trapiko ug kaluwasan sa liboan ka mga turista, bisita ug katawhan ning syudad nga modagsa pagtan-aw sa nagkadaiyang kalihukan sa pista.
Gawas sa kapolisan ug militar, motabang usab ang mga barangay tanod ug civilian volunteers pagpatuman sa hingpit nga seguridad, ilabina sa mga dapit diin nahisakop ang ilang barangay.
Sugod karong adlawa, Agosto 24, sunod-sunod na ang mga core events sa Higalaay Festival 2018 sama sa Cowboy Festival, Miss Cagayan de Oro Coronation Night, Dragon Boat Race, Carnival Parade, Street Parade and Floats, Bisperas Fireworks, Fashion Summit, Religious and Fluvial Procession, ug Pyro Festival.
Matud sa Cagayan de Oro City Information Office nga lakip sa mitambong sa tigom sila si Kagawad Romy Calizo ug Liga ng mga Barangay President Kagawad Yan Lam Lim, COCPO Director Sr/Supt. Nelson Aganon Acting City Administrator Teddy Sabuga-a Jr., Task Force Oro Commander Maj. Anshary Pumbaya, CDRRMD Officer In Charge Allan Porcadilla, RTA Assistant Department Head Engr. Nonito Oclarit ug mga representante sa NBI, Coast Guard, Bureau of Fire ug uban pa.
