Davao City – Gilauman nga magamit na karong bulan sa Hunyo ang high-tech speed gun sa Land Transportation Office (LTO-XI).
Sa ekslusibong pakighinabi sa DXDC News Team kang LTO-XI Regional Director Atty. Gomey Dy, gibutyag niini nga nagapadayon sa pagkakaron ang training sa mga law enforcers alang sa tamang paggamit sa maong speed gun.
Segun ni Dy, adunay on-the-job training (OJT) ang mga law enforcers human sa ilang training diin kung pamilyar na mag-request na usab sila og dugang speed gun didto sa central office.
Gipasabot sa LTO Regional Director nga prayoridad usa sa LTO ang Oplan Balik-Eskwela diin padayon usab ang ilang monitoring sa mga colorum nga transport vehicles kinsa naga hatod sa mga estudyante paingon sa mga tulunghaan.
Dugang ni Dy nga magpahigayon usab sila og operasyon duha ka gabii sulod sa usa ka bulan gumikan adunay night vision ang maong speed gun.
Kahinumdoman nga gi-isyu ang bag-ong high-tech speed gun sa national office nga nagkantidad og P560,000 kaniadtong Mayo 11, 2018.
RadyoMaN Jason Amisola
