Bangkay na sang nasapwan ang isa ka 5-anyos nga bata nga babayi matapos ini ginpatay sang iya man lang 27-anyos nga tiya kahapon sa Brgy. Miranda, banwa sang Pontevedra.
Suno sa imbestigasyon sang Pontevedra Municipal Police Station sa pagpanguna sang hepe sini nga si Police Captain Rhojn Darell Nigos base sa panuaron sang himata sang biktima katapusan nga nakita ang bata las 4 kahapon sang hapon nga nagahampang sa ila ugsaran.
Apang sang ulihi natalupangdan sang iloy nga wala na ang iya bata gani ini ang iya ginpangita tubtub nga nagpangayo na ini sang bulig sa barangay kag pasado las 9 nasapwan ang bata nga patay na sa isa ka lamawan.
Pahayag pa sang pulis nga nagduda ang pamilya sang biktima nga ang suspek ukon may kahimuan sang krimen amo man lamang ang tiya sini bangud madamo ang nakakita sa iya nga didto naghalin sa lugar kon diin nasapwan ang biktima kag puno sang lunang ang iya bayo kag tiil.
Base sa record sang pulis, las 2 kaina sang kaagahon, ginkumprontar na sang iloy sang biktima ang suspek kag didto iya gin-ako nga siya ang nagpatay sa bata pinaagi sa pagkuga sa iya kag paglublob sini sa lamawan.
Siling sang pulis nga sang ila gin-interogar ang suspek, iya ginsiling nga iya ginpatay ang bata agud magtimalos bangud masami siya ginaakigan sang iloy sini kag naga-gwa nga ini ang may depression.
Ang suspek natalana na nga pasakaan sang kaso bwas nga adlaw kag detained ini karon sa Pontevedra MPS.
[image: image.png]
