Hingyo sang mga airline companies nga magdugang sang flights sa Bacolod-Silay Airport, wala gin-aprubahan

Wala gin-aprubahan ni Governor Eugenio Jose Lacson ang hingyo sang mga airline companies nga magdugang sang flights sa Bacolod-Silay Airport.

Paathag sang gobernador, mataas pa sa karon ang kaso sang COVID-19 sa probinsiya kag kun pasugtan ang dugang nga numero sang inbound travelers, sa tunga sang mas halog na nga travel requirements, posible magdamo pa gid ang COVID infections diri.

Nahibaluan nga kun wala sang negative RT-PCR test, mahimo na lamang magpasa sa non-reactive nga rapid antigen test result ang mga inbound travelers.

Dugang pa ni Lacson, sa pihak nga ginpanubuan na sa Alert Level 2 ang status sang Metro Manila, ang record sang Department of Health nagapakita nga mataas sa gihapon ang ila positivity rate nga yara sa 20 percent, mas mataas sa standard sang World Health Organization nga five percent.

Nahibaluan nga sa idalom sang Executive Order 22-03 series of 2022 ni Governor Lacson, ginatugutan ang duha ka flight kada adlaw sa kada airline company nga may ruta Manila-Bacolod-Manila samtang isa ka flight kada semana sa kada airline company naman sa ruta nga Cebu-Bacolod-Cebu.

Facebook Comments