BINALBAGAN – May lampos sang matig-a nga bagay sa iya nga ulo, matapos nga napatay, ginlubong sa kampo sang iya manlang nga kaupod sa ilimnan.
Amu ni ang kapalaran ni Rogelio Las Piñas, 48 anyos soltero kag pumoloyo sang Purok Banda, Barangay Santol sa diin ang suspek ang nakilala kay Joren Carpio alyas Jojo, 35 anyos may asawa sang amu man nga lugar.
Sa pagpangusisa sang Binalbagan PNP paagi kay PO2 Mark Clement Tupas – Officer on Case, naagahan inom ang duha (Pebrero 10) tubtob nga nagbinaisay sa guwa sang balay sang utod nga babaye sang biktima.
Ginhagad pa gani ini sang utod nga babaye nga magsulod na kag magtulog apang nagpangindi ini bangod wala pa naubos ang ila ilimnon.
Sa ebidensya nga nakuha sang Binalbagan PNP nga isa ka pares sang tsinelas, nakit-an nga dumalagan padulong sa sulod sa kampo ang biktima kag didto na sila nag-abtanay sang suspek.
Gamit ang matig-a nga bagay, ginlampusan sa ulo si Rogelio kag para taguon ang kremin ginlubong ini ni Jojo.
Las 10:30 na sang gab-i (Pebrero 10) sang ginreport ni Kagawad Joemarie Ogatis sa Binalbagan PNP nga nagsurender ang suspek nga Jojo sa diin gin-ako sini ang kremin.
Natukiban lang ang malain nga natabo sa biktima sang missing ini halin sa kaagahon tubtob nga nagsurender ang suspek sang gab-i na.
Pagsurender ni Jojo, iya man ginsugid kon diin niya ginlubong ang biktima tubtob nga nakit-an kag ginpakuha sa mga tanod kag gindala sa Soledad Funeral Homes para sa post-mortem examination.
Suno naman kay PCInsp. Albert Sy nga ila na ginahanda ang kaso nga ifile sa Prosecutor’s Office sa diin ila nalang ginahulat ang autopsy report sang NOPPO Crime Laboratory.
