Hinungdan sa paghikog sa aktibong sundalo didto sa Midsalip, gisuta pa sa otoridad

29

Pagadian City – Aminado si Private First Class Arnel Cañete, nga ilang nadiskobrehan si Technical Sergeant Edmundo Lenaming nga wala sa iyang kaugalingon ug kanunay magul-anon dihang wala pa kini mag-unay pagpusil sa iyang kaugalingon 20 metros ang distansya gikan sa ilang kampo sa Mt. Pinukis, Brgy. Duelic sakop sa lungsod sa Midsalip niining probinsya.
Mahinumduman nga naalarma ang tropa sa 14th Division Reconnaissance Company nga gipanguluhan ni 2Lt. Janryl Gumalad dihang nakabati sila og upat ka buto sa armas alas 12:30 niadtong lunes sa kadlawon.
Nagtoo ang pwersa sa kasundalohan nga gi-atake sila sa mga kaaway hinungdan dali nga nakaposisyon ang tropa dungan ang pagbalos sa pagpabuto apan walay niusa ka buto nga sukli gikan sa gidudahang mga rebelde busa nimando si 2Lt. Gumalad nga e-account ang tropa.
Dako ang katingala sa opisyal dihang wala masagul sa ihap sa iyang tropa si Technical Sergeant Edmundo Lenaming ug dihang gipangita patay na kini nakit-an 20 metros gikan sa ilang kampo nga nagunit sa iyang rifle.
Gumikan sa kalayo sa lugar nakahukom ang tropa nga dad-on ang patay nga lawas sa Brgy. Sigapod sakop sa lungsod sa Midsalip.
Sa imbestigasyon sa Midsalip PNP nasuta nga dunay igo pinusilan sa iyang dughan ang biktima nga maoy hinungdan sa hinanali niining kamatayon.

Facebook Comments

From Advertisers