VICTORIAS CITY- Patay ang home-based call center agent sa ciudad sang Victorias matapos ginluthang sang wala pa nakilal-an nga suspek sa Lopez Subdivision, Brgy. 3, las-9:05 kagab-i, Enero 22.
Ginkilala ang biktima kay Maribeth Solatorio, 25-anyos. Sa impormasyon nga nakuha sang DYHB, si Solatorio ang may live-in partner nga priso karun sa BJMP sa ciudad sang Victorias bangod sa kaso nga iligal nga druga kag may duha katuig sila nga bata.
Ini ang naga-istar sa balay ni Francisco Solliza, ang amay sang iya live-in partner. Kagab-I, samtang naga-inom si Solliza upod ang iya mga abyan sa atubang sang ila balay may puti nga pick-up nga nag-parking sa guwa sang balay kag ginpangita si Solatorio.
Ini ang ginguwaan ni Alyas Check-Check nga upod sa naga-inom kag ginpahibalo nga nagakatulog na ang biktima. Apang ila ini ginpukaw kag naguwa sa balay si Solatorio kag gin-atubang ang nagapangita sa iya. Nabatian naman sang mga naga-inom nga naghambal ang suspek nga “ Maribeth wala kana naka kilala sakon, nalipat kana?, kag didto na nila nabatian ang lupok.
Isa ka igo sa naidalom sang iya suso, ang naangkon sang biktima kag dead on arrival ini sang gindala sa Corazon Locsin Montelibano Memorial Regional Hospital. Nakit-an naman sa crime scene ang isa ka empty shell sang calibre .45.
[image: image.png]
