Davao City – Dili mabayran sa salapi ang kalipay nga gibati sa usa ka miyembro sa Sta. Ana Police Precint giilang si Police Cpl. Brian Docog human nga siya gidayeg sa katawhan gumikan sa pag-uli niini ngadto sa tag-iya sa usa ka sling bag nga dunay sulod nga salapi kantidad P200,000 human kini niya makit-i didto sa may Marfori Heights, ning dakbayan niadtong milabay’ng adlaw.
Sa pakighinabi kaniya sa DXDC 621 RMN Davao, si Docog mipasibaw sa iyang tumang pagpasalamat ug kalipay tungod kay daghan ang nakadayeg sa iyang pagkamatinud-anon sa pag-uli sa nawala nga kwarta.
Matud ni Docog nga pinaagi sa iyang gibuhat, siya malaumon nga makahatag kini ug kadasig ngadto sa mga tawo dili lang mga pulis-Davao kon dili sa tibuok nasud.
Gidasig usab ni Docog ang iyang mga kaubanang pulis nga paningkamotang padayong masaligan sa katawhan ilabi na nga kung adunay makit-an nga gamit, kinahanglan i-uli ngadto sa tag-iya.
Dugang ni Docog nga dili lalim nga mawad-an uog butang ilabi na kun salapi maong dili gayud mahimutang ang usa ka tawo ug dili katulog tungod sa kabalaka nga bation.
RadyoMan Don Pulayao
