Davao City-Nagpadayon karon ang hot pursuit operation sa kasundalohan batok sa mga rebelding NPA nga mipusil patay sa duha ka mga sundalo sa Barangay Poblacion, Mawab, Comval Province.
Ang mga biktima giila nga si Private First Class (PFC) Jerome Bocquinlasan, 26, nagpuyo sa Barangay Tuboran, Mawab ug PFC Acolito Aberin, 29, nagpuyo sa Kamansa, Asuncion, Davao del Norte. Mga biktima parehong nadestino sa Headquarters Service Company sa 71st Infantry Battalion, Philippine Army.
Base sa imbestigasyon sa kapulisan, ang mga biktima nagsakay sa Honda RS 125 nga motorsiklo, gikan sa Barangay Poblacion, Mawab, paingon sa ilang kampo sa Purok 8, Barangay Nueva Visayas, Mawab, apan pag-abot sa nasangpit nga lugar, kalit silang gipusil sa upat ka wala mailhing mga lalaki. Human sa pagpamusil gikuha sa mga suspek ang motorsiklo ug cellphone ni PFC Bocquinlasan lakip na ang kalibre .45 nga pistola ni PFC Aberin ug paspas nga miiktad paingon sa Barangay Sawangan, Mawab.
Sa gihimong follow up operation sa Mawab Municipal Police Station, 71st Infantry Battalion, Philippine Army ug Maco Municipal Police Station, narekober sa kapulisan ug militar ang motorsiklo sa biktima didto sa Barangay Magangit, Maco ug laing tulo pa ka XRM nga motorsiklo ang narekober sa kapulisan nga giabandona kilid sa kapilya. Mga sakop sa Special Partisan Unit sa Guerrilla Front 2, SMRC ang gitudlong suspek sa krimen.
Kasamang Bernard Pantallon
