TACLOBAN CITY – ‘House cleaning’ ini an matatabo ha City Hall ha paglingkod ni Mayor Alfred Romualdez, ha pagtikang han iya termino.
May mga empleyado daw kasi nga diri tuhay nga nagtatrabaho.
Pormal na nga lumingkod hi Mayor Alfred kumo city mayor dida han lunes, July 1, ginbalyuan niya an iya asawa nga hi Cristina nga kumapot han syudad ha sakob han tulo katuig o usa katermino.
“Lahat ng kailangang changes then we will implement changes. Most of them I have worked before and they knew that my demands are very high and I set a high standard. So I expect them, no less, really hard work.”
Nagserbe na hi Mayor Alfred kumo mayor han Tacloban ha sakob han 9 katuig ngan nagtapos dida han tuig 2016.
Han pakianhan kun mayada ba hiya plano nga diri ipadayon an pira nga programa ngan proyekto nga gin implementar han nakalabay nga administrasyon, sumala kan Romualdez madepende ini ha mga rason.
Pero sumala ha iya, waray hiya manginlabot durante han administrasyon han iya asawa.
Samtang, sisiguraduhon ni Mayor Alfred an ngatanan nga basic services nga kikinahanglanon han mga Taclobanon.
Usa gihapon ha mga popokusan han alkalde an environmental protection, apil na dinhi an solid waste management o an problema ha pagtaga-basura.
