Sa dili madugay makaangkon na gajud an mga empleyado sa gobyerno sa probinsiya nan kaugalingon na panimayay na maabot ra sa ila bulsa . Ini human na nagtigum kuman bag o an Provincial Housing Board sa pagpanguyo nila Provl. Administrator Premolito Plaza sanan Provl. Planning coordinator Arturo Cruje para maplastar na an tanan mga plano sa pagtukod nan housing project na isa sa mga programa na nakahan-ay sa administrasyon ni Gov. Sol Matugas.Sumaya pa na tinguha kuman nan probinsya na mahan-ay na an mga rekisitos para madali an pagtukod sa amo na proyekto kon diin an mga empleyado sa kapitolyo amoy una na makabenepisyo nan ini labina jadton diniyos sa panerbisyo sanan way mga kaugalingon na panimayay o nagrenta lamang hangtud kuman , lakip na jadton jaun naghuya sa mga hilit o delikado na lugar. Kwalipikado isab an mga interesado na individual na suod sa kapitolyo naghuya bisan paman kon ini dili empleyado sa kapitolyo provincial. Nahibaw-an isab nan RMN Surigao na moabot sa inisyal na 3.5 hektarya na luna sa lupa sa brgy Cagniog inin syudad an plano na tukuran nan amo na mga panimayay, diin ini alayon isab sa PAG IBIG sanan iban pa na ahensya sa gobyerno.Tagbutyag isab ni Atty. Premolito Plaza, Provincial Administrator na sunod na semana himuon na an pagpanday sa kasabutan tali ni Gov.Sol Matugas para mapresentar na sa HLURB sanan maaksyunan na dajon sa mga sakop sa konseho sa probinsya pinaagi na sa pagpanguyo ni Vice Gov. Arturo Carlos Egay Jr. Tinguha isab nan kagamhanan sa probinsya na masugdan an amu na proyekto sa buyan nan Abril sunod na tuig.
