Davao City- Wala gilimod sa usa ka kapitan sa Brgy.dinhi sa syudad sa Davao nga hugaw ang mga coastal areas dinhi sa dakbayan tungod sa mga basura diin subay kini sa giingon ni Davao City Mayor Inday Sara Duterte-Carpio nga bisan tuod limpyo ang hangin sa syudad, gidamakan siya sa mga tao nga nagalabay og basura sa mga coastal areas.
Sa interview sa DXDC RMN Davao kang 76-A Bucana Brgy. Captain Rolando Trajera, daghan gihapong basura ang nagtapok sa ilang Brgy. ilabi na kung ting-ulan ug kung ting high tide, namatikdan nga bisan sige sila og limpyu, daghan gihapon basura ang nagtapok.
Nagatuo si Trajera nga ang mga basura dili lang gikan dinhi sa mga tao sa syudad apan gikan didto sa bukid, hinaut niya nga tanang katawhan magbaton og tamang pag-segregate sa mga basura.
Tungod sa maong problema sa coastal areas, gideklarang coastal cleanup time sa lokal nga gobyerno ang una ug ikatulong Sabado kada bulan gani giawhag ni Mayor Inday ang mga clean air advocates nga mahimong Bantay Dagat Volunteers aron nga hingpit ng malimpyu ang mga kadagatan sa syudad sa Davao.
RadyoMan Renz Barbarona
