Namatikdan sa asawa sa Chief Tanod sa Barangay Dayawan, Villanueva, Misamis Oriental kinsa misunog sa iyang balay ug mipusil sa ilang kapitan niadtong adlawng Biyernes nga lahi na ang inistoryahan sa iyang bana.
Matud sa asawa nga si Bella Puguin, nga niadtong adlawa gikan nagduty sa barangay ang iyang bana ug nangayo kini og kape kaniya.
Dugang pa sa asawa nga samtang tua siya sa luyo, kalit lamang nga mitunga ang iyang bana ug giignan siya nga molakaw, kay adunay mopatay kanila.
Kini ang hinungdan nga mituyok siya aron habwaon unta ang ilang nilabhan, apan dako na lang ang iyang kakurat dihang nasunog na ang ilang payag.
Dihang iyang giignan ang iyang bana nga nasunog ang ilang payag, igo lamang kini miingun nga pasagdan lamang ug nagsinggita nga kung kinsay buot mpatay kaniya, moduol lamang.
Samtang sige matud pa og kapasmohan ang iyang bana ilabi na kung naa sa trabaho.
Matud sa asawa, nga wala usab siya kabalo kung asa gikan ang sumpak nga gigamit sa iyang bana sa pagpusil sa ilang Kapitan, dihang misulay unta kini sa pagtabang aron mapalong ang kalayo.
Dugang pa sa asawa, nga dugay na niya nakita ang sumpak, apan wala siya masayud nga mubuto diay ang maong butang.
